Siaran Pers
15 Agustus 2014

Bismillaahir Rahmaanir Rahiim
Keu Bandum Bansa Atjèh,
Assalammu'alaikum w.w.

Liwat siaran njoë ASNLF meupeuteugaih keulai, bahwa tjita² bansa Atjèh untôk peudong keulai dèëlat bansa dan neugara seunambông hana tom leukang nibak haté aneuëk tjutjô bansa Atjèh.

Sikureuëng thôn lheuëh meutèkèn Nota Saban Muphôm, MoU Helsinki, seumakén trang keu geutanjoë, bahwa deungon meubagoë tjara dan ilah djipeugadoh hak peuteuntèë naséb droë bansa Atjèh. Naséb MoU Helsinki njan hana djuôh bida deungon naséb Ikrar Lamtéh. Bidadjih nakeuh teumpat dan masa sagai: meunjoë dilèë dji tékèn Ikrar Lamtéh di dalam nanggroë (Lamtéh) bak thôn 1957, seudangkan MoU Helsinki di lua nanggroë (Helsinki, Finlandia) bak thôn 2005.

Uroë njoë ka deuh takalon keudroë teuh bahwa propaganda njang seulama njoë djisuleuëng dalam babah geutanjoë bahwa ”MoU njan tangui sibagoë saboh djalan atawa aneuk rinjeun untôk tjok meurdéhka” teunjata kon mandum. Geutanjoë ka biasa tadeungo nibak mantan ”peutinggi”² GAM narit-narit lagèë “peurdjuangan Atjèh kon untôk meurdéhka” dan laén². Ban² njoë ka teudeungo lom bahwa “Mimpi Memerdekakan Aceh Sudah Kami Lupakan”.

Geutanjoë han djeuët hireuën-teuh watèë na peunjata-peunjata lagèë njan dari mantan pimpinan GAM, sabab watèë awaknjan ka djiteurimong droë sibagoë sarông djaroë RI di Atjèh dan djimeusumpah deungon nan Allah akan seutia keu pantjasila dan undang-undang dasar 45, maka tugaih awaknjan hana laén nibak peutimang kekuasaan droë dan djaga keupeunténgan RI di bumoë Atjèh.

Saboh bukti treuk, bahthatpih djaroë-gaki RI sidumnan djimeuseutia bak satoh kepenténgan awaknjan di Atjèh, Djakarta teutap tjuriga dan han djipeutjaja meubatjut pih keu ureuëng Atjèh dan malah djitamah peuhina lom deungon tjara djipeunenen/djipeumaén-maén peuë mantong njang kalheuëh djimeudjandji dalam MoU Helsinki atawa UUPA. Akibatdjih, Atjèh sitjara politik, ekonomi, peundidékan, sosial & budaya, kon meutamah maju, akan teutapi djioh meusurôt u likôt, dan njang tanggông akibat nakeuh mutlak bansa Atjèh.

Sipatôt djih bansa Atjèh musti ka le that go djeuët geumeurunoë nibak politék teumipèë Djakarta seulama 9 thôn njoë, tapi keunjataan djih lagèë hana keudjadian sapeuë. Meumakna, bansa Atjèh mantong meusuruëk ladju dalam uruëk² sot, deungon hana ôsaha meubatjut pih untôk teungoh dari sinan. Geutanjoë han akan madju, sidjahtra atawa keumah dong keudroë deungon tjara² njang ka geupeudjak seulama njoë, njakni tjara keumadè atawa djak meudahoh bak gob. Pada hai nanggroë geutanjoë lua biasa kaja neubri uléh Po Teuh Allah.

Hasé alam njang na dalam pruët dan ateuëh bumoë Atjèh beukeumah ta-olah keudroëteuh. Peuë lom djinoë aneuëk² bansa Atjèh kaleubèh tjeudaih dalam meubagoë 'ileumèë. Tapi njan bandum hana mungkén keumah peulaku meunjo geutanjoë mantong tameukiblat u Djakarta, meunjo hana ôsaha untôk dong keudroë dan beuhe tjok sikap njang pasti² untôk keu tudjuan njan.

Seubagoë haba peu-ingat, bahwa 17 Agustus tinggai padum uroë treuk. Keu geutanjoë, uroë neuhaih njan nakeuh uroë malapeutaka keu bansa Atjèh, uroë rasmi bansa Atjèh keunong peungeut. Djadi that gura meunjo geutanjoë tadjak peuramè “uroë raja” gob, uroë puntja peugadoh identitaih geutanjoë sibagoë saboh bansa njang meurdéhka dan meudèëlat, djiôh sigohlom neugara illegal Indonesia njan djipeulahé.

ASNLF, sibagoë saboh wadah aneuëk bansa njang peudjak misi dan aspirasi Atjèh meurdéhka, akan teutap peugot langkah² konsolidasi untôk peuwudjôd tjita² njan. Ide, pikéran, teunaga dan sigala kemampuan njang na bak bansa Atjèh akan sabé tangui untôk peutentèë naséb droëteuh di masa ukeuë.

Wassalam

Ariffadhillah
Keutuha Presidium

#####